डोंगरकठोऱ्यात बहिणीच्या लग्नाच्या दिवशी भावाचा हृदयविकाराने मृत्यू

डोंगरकठोऱ्यात बहिणीच्या लग्नाच्या दिवशी भावाचा हृदयविकाराने मृत्यू

लेवाजगत न्यूज डोंगरकठोरा (ता.यावल) -येथे बहिणीच्या लग्नासाठी आलेल्या भावाचा हृदयविकाराने मृत्यू झाल्याची दुर्दैवी घटना रविवारी घडली. राकेश लिलाधर सरोदे असे मृताचे नाव आहे. डोंगरकठोरा येथील लीलाधर रामा सरोदे यांची मुलगी नमिता हिचा विवाह दहिगाव येथील राहुल लीलाधर पाटील याच्याशी १७ रोजी नियोजित होता. त्यासाठी शनिवारी रात्री वर पक्षाकडील मंडळींनी नाचगाण्याचा आनंद लुटला. पण, १७ रोजी पहाटे दोन वाजेचे सुमारास नववधू नमिता हिचा लहान भाऊ राकेश याचा डोंगरकोठारा येथील स्वामीनारायण मंदिरात झोपलेला असताना हृदयविकाराने मृत्यू झाला. राकेशला त्याचे वडील लीलाधर सरोदे यांनी स्वामीनारायण मंदिरात सेवेकरी म्हणून सुपूर्द केले होते. तो गुजरात राज्यातील वडताल येथील स्वामीनारायण मंदिरात राहत होता.

    बहिणीच्या लग्नासाठी राकेश १६ नोव्हेंबरला रात्री डोंगरकठोरा येथे आला. यानंतर स्वामीनारायण मंदिरातच निवास केला. झोपेतच पहाटे २ वाजेच्या सुमारास राकेशला हृदयविकाराचा झटका येऊन मृत्यू झाला. यानंतर त्याचा मृतदेह अंत्यसंस्कारासाठी गुजरातमधील वडताड येथे रवाना करण्यात आला. या दुखद प्रसंगानंतर रविवारी राहुल आणि नमिताचा विवाह साध्या पद्धतीने पार पडला. राकेशच्या पश्चात आई,भाऊ आणि बहीण नमिता असा परिवार आहे.