“धक्काबुक्की केली, फोन हिसकावला, गैरवर्तन केले”; लालबागचा राजाच्या दर्शनाला गेल्यावर अभिनेत्रीला आला वाईट अनुभव

 

“धक्काबुक्की केली, फोन हिसकावला, गैरवर्तन केले”; लालबागचा राजाच्या दर्शनाला गेल्यावर अभिनेत्रीला आला वाईट अनुभव

वृत्तसंस्था मुंबई -Simran Budharup Shared Shocking Video of Lalbaugcha Raja Darshan: सगळीकडे गणेशोत्सवाचा (Ganesh Utsav 2024) उत्साह आहे. त्यामुळे लोक बाप्पाच्या दर्शनासाठी वेगवेगळ्या ठिकाणी जातात. मुंबईत अनेक सेलिब्रिटी गणेशोत्सवादरम्यान सिद्धिविनायक व लालबागचा राजाच्या दर्शनासाठी जातात. ‘पंड्या स्टोअर’ फेम अभिनेत्री सिमरन बुधरूप तिच्या आईबरोबर लालबागचा राजाच्या (Lalbaugcha Raja Darshan) दर्शनासाठी गेली होती. तिथे तिच्याबरोबर धक्कादायक प्रकार घडला.

      हे बघा व्हिडीओ-सिमरनने तिच्या इन्स्टाग्राम अकाउंटवर टाकलेला  व्हिडीओ   https://www.instagram.com/reel/C_0zm0wt3mB/?igsh=dDRnam9vcGM1cWp6

    सिमरनने तिच्या इन्स्टाग्राम अकाउंटवर एक व्हिडीओ शेअर केला आहे. तिने दर्शनाला जाण्याचा अनुभव खूप वाईट होता, असं व्हिडीओच्या कॅप्शनमध्ये लिहिलं आहे. सिमरनने व्हिडीओ शेअर करून लालबागचा राजा पंडालच्या बाऊन्सर्सनी तिला आणि तिच्या आईला धक्काबुक्की केली असा आरोप केला आहे.

     सिमरनने सांगितला धक्कादायक अनुभव

सिमरनने व्हिडीओ इन्स्टाग्रामवर शेअर करत लिहिलं, “आज मी माझ्या आईबरोबर लालबागचा राजाचे आशीर्वाद घेण्यासाठी गेले होते, पण तेथील कर्मचारी आमच्याशी ज्या पद्धतीने वागले, त्यामुळे आमचा अनुभव वाईट ठरला. माझी आई फोटो काढत असताना कर्मचाऱ्यांपैकी एका व्यक्तीने तिचा फोन हिसकावून घेतला. ती रांगते माझ्या मागे होती. तिने दर्शनासाठी जास्त वेळ घेतला नव्हता. तिच्यापुढे मी असल्याने मी दर्शन घेत होते आणि ती मागे असल्याने फोटो काढत होती. आईने फोन परत मागण्याचा प्रयत्न केल्यावर त्यांनी तिला धक्काबुक्की केली.”

     तिने पुढे लिहिलं, “मी हस्तक्षेप केल्यावर बाऊन्सर्सनी माझ्याशी गैरवर्तन केलं. मी त्यांच्या वर्तणुकीचा व्हिडीओ रेकॉर्ड करण्यास सुरुवात केल्यावर त्यांनी माझा फोन हिसकावण्याचा प्रयत्न केला. (या व्हिडीओमध्ये ओरडणारी मी आहे. “असं करू नका, तुम्ही काय करताय?” मी अभिनेत्री आहे हे कळल्यावर ते परत गेले.”

  “ही घटना जागरूकता आणि जबाबदारीची गरज असल्याचं दर्शवते. सकारात्मकता आणि आशीर्वादासाठी चांगल्या हेतूने लोक अशा ठिकाणी भेट देतात. त्याऐवजी, आम्हाला आक्रमकता आणि अपमान सहन करावा लागला. गर्दीवर नियंत्रण ठेवणं आव्हानात्मक आहे, हे मला माहीत आहे. पण भाविकांशी कोणतेही गैरवर्तन न करता सुव्यवस्था राखणे ही कर्मचाऱ्यांची जबाबदारी आहे,” असंही सिमरन म्हणाली.

   “घडलेल्या प्रकाराकडे लक्ष वेधण्यासाठी मी हा व्हिडीओ शेअर करत आहे. या व्हिडीओनंतर आयोजक आणि कर्मचारी इथे येणाऱ्या भाविकांशी आदराने वागतील अशी आशा आहे,” असंही सिमरनने कॅप्शनमध्ये लिहिलं.

संदर्भ-लोकसत्ता