भीषण अपघातात आईसह दोन मुले व भाच्याचा मृत्यू, परिसरात संतापाची लाट
भीषण अपघातात आईसह दोन मुले व भाच्याचा मृत्यू, परिसरात संतापाची लाट
लेवाजगत न्यूज जळगांव-भरधाव वेगाने जाणार्या कारने दिलेल्या धडकेत महिलेसह तिची दोन्ही मुले आणि त्या महिलेचा भाचा अशा चौघांचा मृत्यू झाल्याने मोठी खळबळ उडाली आहे.
या संदर्भातील माहिती अशी की, जळगाव ते पाचोरा मार्गावर असलेल्या रामदेववाडी येथे काल सायंकाळी भीषण दुर्घटना घडली. शिरसोली येथील रहिवासी असलेल्या राणी उर्फ वत्सलाबाई सरदार चव्हाण (वय ३० ) या मंगळवारी दुपारी ४.३० वाजेच्या सुमारास आपल्या एमएच. १९.ईई. ८९२५ क्रमांकाच्या दुचाकीने शिरसोलीकडे जात होत्या. दरम्यान, रामदेववाडी गावाच्या पुढील घाटाच्या जवळच जळगावकडून एमएच. १९.सीव्ही. ६७६७ या क्रमांकाची कार भरधाव वेगाने आली. या कारने दुचाकीला जोरदार धडक दिली. या अपघातामध्ये राणी सरदार चव्हाण यांच्यासह त्यांचा मुलगा सोहम वय ७, सोमेश (वय ४) हे जागीच ठार झालेत. तर लक्ष्मण भास्कर राठोड ( वय १६, रा. लोंढ्री ता. जामनेर ) याचा उपचार सुरू असतांना रात्री उशीरा मृत्यू झाला.
या अपघाताची माहिती कळताच सरदार चव्हाण आणि नातेवाईकांनी घटनास्थळी धाव घेतली. संतप्त जमावाने अपघात करणार्या चारचाकीसह तरुणांना घेऊन जाण्यासाठी आलेल्या चारचाकी क्रमांक एमएच.१९.सीजे.११७७ ची देखील तोडफोड केली. तसेच, याप्रसंगी कारमध्ये असणार्या तिघांचा चोप देखील देण्यात आला. एमआयडीसी पोलिसांसह एलसीबीचे निरीक्षक किसनराव नजन पाटील, एमआयडीसी पोलीस ठाण्याचे निरीक्षक बबन आव्हाड यांच्यासह फौजफाटा घटनास्थळी पोहचल्याने येथील वातावरण आटोक्यात आले.
दरम्यान, या अपघातातील मृतांच्या आप्तांनी केलेल्या आक्रोशामुळे उपस्थितांचे मन हेलावले. राजकीय पदाधिकाऱ्यांची पोलिस ठाण्यात हजेरी
अपघात घडवणाऱ्या कारमधील अखिलेश हा जिल्हा बँकेचे अध्यक्ष संजय पवार यांचा मुलगा आहे. अर्णव हा शासकीय कंत्राटदार अभिषेक कौल यांचा तर ध्रुव हा नीलेश सोनवणे यांचा मुलगा आहे. अर्णव व अखिलेश हे शहर पोलिस ठाण्यात आल्यानंतर राष्ट्रवादीचे जिल्हाध्यक्ष (शरद पवार गट) अॅड. रवींद्र पाटील, जिल्हा बँकेचे एमडी जितेंद्र देशमुख, राजेश पाटील आदी पोलिस ठाण्यात दाखल झाल्याचे समोर आले.
गाव शोकमग्न : रामदेववाडीत स्मशान शांतता
रामदेववाडीतील प्रत्येक घराशी संपर्क असलेली आशा वर्कर राणी चव्हाण माहेरून आपल्या घरी रवाना झाल्यानंतर काही मिनिटातच त्यांचा अपघात झाला. राणीसोबत त्यांचे दोन्ही मुलांचाही मृत्यू झाल्याच्या घटनेने रामदेववाडी शोक सागरात बुडाली. रात्री उशिरापर्यंत गावात गटागटात नागरिक शोक व्यक्त करीत होते.
कोणत्याही टिप्पण्या नाहीत