मानाच्या सोन्याच्या दहीहंडीचा उत्साह गगनाला भिडला.

 

मानाच्या सोन्याच्या दहीहंडीचा उत्साह  गगनाला भिडला.

उरण (सुनिल ठाकूर ):-नवी मुंबई येथील  सानपाडा येथील साईभक्त सेवा मंडळ आयोजित भव्य सोन्याची दहीहंडी - २०२३ मोठ्या उत्साहात गुरुवार दिनांक ७ सप्टेंबर २०२३ रोजी पार पडला. या कार्यक्रमाचे आयोजक साई भक्त सेवा मंडळाचे अध्यक्ष .पांडुरंग विठ्ठल आमले यांच्या मार्गदर्शनाखाली भव्य सोन्याची दहीहंडी दरवर्षीप्रमाणे याही वर्षी जल्लोषात साजरी केली. 

या दरम्यान साईभक्त महिला फाउंडेशनच्या महिला सदस्यांसाठी हंडी सजावट स्पर्धेचे आयोजन केले होते. एकूण १३ स्पर्धकांनी यामध्ये हिरिरीने सहभाग घेतला होता. हंडी सजावट स्पर्धेसाठी प्रथम, द्वितीय, तृतीय क्रमांक  आणि उत्तेजनार्थ दोन नंबर देण्यात आले. या कार्यक्रमासाठी उपस्थिती लावलेले प्रमुख मान्यवर बेलापूर मतदार संघाच्या कार्यसम्राट आमदार मंदाताई  म्हात्रे आणि त्यांचे सुपुत्र श्री निलेश म्हात्रे इत्यादी मान्यवर उपस्थित होते. माननीय आमदार मंदाताई म्हात्रे यांनी गोविंदा रे गोपाळा...या कृष्णाच्या पारंपारिक गाण्याने सर्व प्रेक्षक वर्गाला उत्साहाची ऊर्जा दिली.  

आर नाईक इव्हेंट च्या  काही कलाकारांचे नृत्य सादरीकरण प्रेक्षकांना पाहायला मिळाले तसेच नवी मुंबईतील नावाजलेला प्रसिद्ध लावणी सम्राट अशिमिक कामठे याच्या लावणीची झलक सुद्धा प्रेक्षकांना पहायला मिळाली आणि या बहारदार कार्यक्रमाचा सर्वांनीच मनमुराद आनंद लुटला. याबरोबरच इयत्ता दहावी आणि बारावीच्या गुणवंत विद्यार्थ्यांचा सत्कार सन्मानचिन्ह देऊन करण्यात आला. समाजसेवक पांडुरंग विठ्ठल आमले यांनी या कार्यक्रमाचे औचित्य साधून विविध स्तुत्य उपक्रम राबवून समाजाला एक सामाजिक बांधिलकीचा संदेश  दिला. यावर्षीच्या  मानाच्या सोन्याच्या दहीहंडीचा मान माझगावचे संघर्ष गोविंदा पथक  यांनी पटकावला आणि उपविजेता म्हणून ऐरोली कोळीवाडा  गोविंदा पथक, नेरूळ मधील एकविरा गोविंदा पथक तसेच 'कोळी बॉईज घनसोली पथक यांना ट्रॉफी देऊन सन्मानित करण्यात आले. या कार्यक्रमाला साईभक्त सेवा मंडळ आणि साईभक्त महिला फाउंडेशन मधील सर्व सदस्यांचे कार्यक्रम उत्तमरीत्या यशस्वीपणे पार पडण्यासाठी मोलाचे सहकार्य लाभले.