नंदुरबारमधील विवाहितेचा दुसरा शवविच्छेदन अहवाल समोर, डॉक्टरांकडून संशय व्यक्त

 लेवाजगत न्युज:-धडगाव तालुक्यात बलात्कार करून हत्या केल्याचा संशय असलेल्या २१ वर्षीय महिलेवर शुक्रवारी पहाटे जेजे रुग्णालयात दुसरे शवविच्छेदन करण्यात आले. नंदुरबारमधील एका व्यक्तीने तिच्या २१ वर्षीय मुलीचा मृतदेह मिठाच्या खड्ड्यात ४४ दिवस पुरुन ठेवला होता. त्यांचा असा संशय होता की त्यांच्या मुलीवर बलात्कार करुन तिची हत्या करण्यात आली. जेजेच्या फॉरेन्सिक तज्ञांनी पुष्टी केली की महिलेचा मृत्यू रहस्यमय परिस्थितीत झाला आहे आणि तिच्या मृत्यूच्या घटनांबद्दल प्रश्न उपस्थित केले आहेत.

नंदुरबारच्या या महिलेचा मृतदेह गुरुवारी भायखळा येथील जे.जे. रुग्णालयात आणण्यात आला आणि शुक्रवारी पहाटे २.३० वाजता तिच्यावर पुन्हा एकदा शवविच्छेदन करण्यात आले, असं अधिकाऱ्यांनी सांगितलं. टाइम्सला मिळालेल्या माहितीनुसार, महिलेच्या मानेवर बांधून ठेवल्याच्या खुणा आढळल्या आहे. महिलेचा उजवा हात अकार्यक्षम, तर डावा हात व्यवस्थित होता, त्यामुळे ती स्वत:ला कसे लटकवेल, हे देखील तज्ज्ञांना गोंधळात टाकणारे आहे.

४५ दिवस बापाने मृतदेह मिठाच्या खड्ड्यात ठेवला

धडगाव तालुक्यातील खडक्या येथील विवाहिता रंजीला वळवी या १ ऑगस्ट रोजी लटकलेल्या अवस्थेत आढळून आल्या होत्या. चार जणांनी तिच्यावर बलात्कार केल्याचा दावा तिचे वडील अंतरसिंग वळवी यांनी केला होता, असे पोलीस अधिकाऱ्यांनी सांगितले. तिच्या वडिलांनी दुसऱ्या शवविच्छेदनापूर्वी तिचे अंतिम संस्कार करण्यास नकार दिला. त्यांनी तब्बल ४५ दिवस मुलीचा मृतदेह मिठाच्या खड्ड्यात पुरुन ठेवला होता.

पहिल्या शवविच्छेदन अहवालानुसार हे आत्महत्येचं प्रकरण

खरं तर, नंदुरबारमध्ये करण्यात आलेल्या पहिल्या शवविच्छेद अहवालात हे आत्महत्येचे प्रकरण असल्याचे म्हटले होते आणि कोणत्याही प्रकारचा गैरप्रकार नाकारण्यात आला होता. मात्र, जेजेच्या डॉक्टरांनी दिलेली माहिती संशय व्यक्त करणारी आहे. “एक हात असलेली व्यक्ती दोरी बांधून स्वत:चा जीव घेऊ शकत नाही हे सहज सांगता येईल. हा मृत्यू संशयास्पद आहे, यात काहीही शंका नाही,” असं सूत्राने सांगितले.

दुर्दैवाने, याही शवविच्छेदन अहवालात लैंगिक अत्याचाराच्या आरोपावर जास्त काही माहिती देण्यात आलेली नाही. कारण, मिठाच्या खड्ड्यात असूनही मृतदेह अर्धवट कुजलेला होता, असे रुग्णालयातील सूत्रांनी सांगितले. “मृतदेह प्लास्टिकच्या शीटमध्ये गुंडाळून मिठाच्या खड्ड्यात ठेवण्यात आला होता. त्यामुळे मृतदेहाचं विघटन पूर्णपणे थांबवलं जाऊ शकत नाही,” असंही सूत्रांनी सांगितलं. "यामुळे तिच्यावर लैंगिक अत्याचार झाले की नाही हे अद्याप अनिश्चित राहिले आहे," असंही त्यांनी सांगितलं.

पोलिसांना महिलेच्या अपंगत्वाबाबत माहिती देण्यात आली नाही

शवविच्छेदनानंतर शुक्रवारी पहाटे मृतदेह कुटुंबीयांच्या ताब्यात देण्यात आल्याचे रुग्णालयाने सांगितले. जेजे रुग्णालयाच्या शवविच्छेदनाच्या निष्कर्षांमुळे तपासामध्ये नक्कीच नवीन भर पडेल, असे महाराष्ट्राचे महानिरीक्षक मिलिंद भारंबे म्हणाले. या प्रकरणी तीन जणांना यापूर्वीच अटक करण्यात आली आहे. “पहिल्या शवविच्छेदनानंतर तिच्या उजव्या हाताच्या अपंगत्वाबद्दल आम्हाला काहीही सांगण्यात आले नव्हते”, अशीही माहिती त्यांनी दिली.

पोलिसांनी या प्रकरणाचा योग्य तपास केला नाही, त्यामुळे मृतदेहावर अंत्यसंस्कार करण्याऐवजी जतन करण्याचा निर्णय घेतल्याचा आरोप पीडित कुटुंबीयांनी केला होता. दुसरं शवविच्छेदन करता यावं म्हणून ते विघटन रोखण्याच्या आशेने त्यांनी ते मिठाने भरलेल्या खड्ड्यात पुरले होते.