एसटी कर्मचारी पुन्हा संपावर जाणार? कामगार संघटनेची महामंडळाला ईशारा

लेवाजगत न्युज:-राज्यातील नागरिकांना नवरात्र, दसरा, दिवाळी या सणांचे वेध लागलेले असताना, एसटी महामंडळातील एसटी कामगार संघटनेने पुन्हा एकदा एसटीसंपाची चाचपणी सुरू केली आहे.

एसटी कर्मचाऱ्यांचे २०२०पासून थकीत देणी तातडीने देणे, मॅक्सीकॅबला प्रवासी परवाने देऊ नये या आणि अशा एकूण ३४ मागण्यांसाठी राष्ट्रवादी काँग्रेसच्या एसटी कामगार संघटनेने लाक्षणिक उपोषणाची नोटीस एसटी महामंडळाला दिलेली आहे. आज, गुरुवारी संपाच्या नोटीसवर महामंडळात चर्चेचे आयोजन करण्यात आले आहे.

महाविकास आघाडी सरकारच्या काळात शिवसेनेकडे परिवहन आणि एसटी महामंडळ असताना कर्मचाऱ्यांना आयते कपडे देण्याचा निर्णय घेण्यात आला. मात्र, या एसटी गणवेशात अनेक त्रुटी असल्याने आधीप्रमाणे कापड आणि शिलाई भत्ता द्यावा, अशी मागणी एसटी कामगार संघटनेने केली आहे.

  मे २०२२ मध्ये तत्कालीन परिवहनमंत्री अनिल परब यांनी मॅक्सीकॅबला प्रवासी वाहतुकीचे परवाने देण्यासाठी समिती स्थापन केलेली होती. एसटी वाहतुकीला धोका निर्माण होणाऱ्या मॅक्सीकॅबला मंजुरी देऊ नये, तसेच एसटी महामंडळाच्या कर्मचाऱ्यांना सातवा वेतन आयोग लागू करावा, खात्यामार्फत बढती परीक्षेत अनुत्तीर्ण झालेल्या कर्मचाऱ्याचा फेरतपासणी करावी, २०२० पासून थकीत वैद्यकीय भत्ता तातडीने कर्मचाऱ्यांना द्यावा, या मागण्यांसाठी २२ ऑगस्टला उपोषणाची नोटीस देत १७ सप्टेंबरपासून उपोषणाची हाक कामगार संघटनेने दिलेली आहे.

एसटी कामगार संघटनेच्या पदाधिकाऱ्यांशी चर्चा करण्यासाठी महामंडळाच्या कामगार विभागातील महाव्यवस्थापकांनी आज,गुरुवारी१५ सप्टेंबरला दुपारी २ वाजता चर्चेचे आयोजन केले आहे. या बैठकीत उपोषणाच्या नोटीसवर चर्चा करण्यात येणार आहे, असे महामंडळाकडून सांगण्यात आले.

एसटी महामंडळाचे राज्य सरकारमध्ये विलीनीकरण करावे, या मागणीसाठी एसटी कर्मचाऱ्यांनी २७ ऑक्टोबर २०२१ पासून काम बंद आंदोलन सुरू केले आहे. जवळपास सहा महिने एसटी कर्मचार्यांचा संप सुरू होता.

  मार्च २०२२मध्ये न्यायालयाच्या हस्तक्षेपानंतर कर्मचाऱ्यांनी कामावर येण्यास सुरुवात केली. संपकाळात पगाराविना आर्थिक संकटापुढे टिकाव न धरू शकलेल्या८०हून अधिक कर्मचाऱ्यांनी आत्महत्या करत आपले जीवन संपवले होते. संपकाळात कंत्राटी पद्धतीने कामावर घेतलेल्या चालकांचेही काम थांबवण्याचा निर्णय महामंडळाने नुकताच घेतला आहे.